Carita Bodor

CARITA TILU BEURIT

Dina hiji poe, di dunya sasatoan aya tilu beurit anu manehna teh sohib. Manehna ngekos di handapeun solokan, ana kana tilu keju sabulan taripna. Ngaran eta beurit teh nyaeta Sodikin, Dulang jeung Aburijal. Ayeuna manehna tiluan keur karuliah S-1 jurusan akuntansi.

Hiji peuting, manehna tiluan rek narongkrong di seven eleven. Ceunah mah rek gaul. Pas keur di jalan, manehna meuni ku reuwas sabab ningali babaturan nu sejenna jadi korban tabrak lari mobil ambulan. Sabab ambulan oge teu paduli jeung manehna, enggeus weh eta mayit teh diantep ngagoler di jalanan. Sateuacan nepi ka TKP (seven eleven), manehna tiluan ningali oray kobra. Eta kobra teh ngoray. Sabab sieun dicaplok, manehna nyarumput. Ditingalian eta oray teh nyaeta indung jeung anaknya. Ceunah mah anaknya geuring, sabab letahna kagegel pas keur ngadahar jangkrik. Alhamdulillah ieu tilu beurit aman, lanjut deui jalan ka sevel.

Di seven eleven, aya deui masalahna. Manehna papanggih jeung jagoan beurit. Eta jagoan ceuk batur mah pernah ngadahar ucing, luar biasa! Jagoan beurit nangtang ka eta tilu beurit.

"Ari maneh teh jagona naon?" ceuk jagoan beurit ka Sodikin.

"Maneh nyaho eta parangkap beurit nu ngaranna sentek? Tah ku aing eta dijadikeun kaulinan, Ajleng ajlengan" ceuk Sodikin ka eta jagoan.

"Bener euy jagoan. Nah, ari maneh jagona naon?" ceuk jagoan beurit ka Dulang.

"Maneh nyaho eta racun beurit anu merekna d***ora? Tah ku aing eta dijadikeun kadaharan sapopoe, geus jiga royco weh eta mah" ceuk Dulang ka eta jagoan.

"Luar biasa euy hebatna! Jig ayeuna, ari maneh jagona naon?" ceuk jagoan beurit ka Aburijal.

"Maneh nyaho eta si Siti ucing kembang desa ti Garut? Eta kabogoh abdi. Insya Allah mah mun euweuh nanaon, 2 bulan deui rek ngajuru." ceuk Aburijal ka eta jagoan beurit.

"Ternyata maraneh teh jaragoan nyaa!"

"Nah ari maneh teh jagona naon jagoan? Ari ceunah pernah ngadahar ucing?" ceuk Sodikin.

"Nyaho Upin Ipin? Unggal poe ditongton ku aing!" ceuk jagoan.

"Naon jagona? Apan eta mah film budak leutik, ah siah ngawadul!" ceuk Aburijal.

"Teu make subtitle !!" ceuk si jagoan beurit emosi.

Tilu beurit eta teu bisa ngomong nanaon deui......................